Трите најчудни зборови - Вислава Шимборска

__

Кога го изговарам зборот Иднина,
првиот слог веќе припаѓа на минатото.

Кога го изговарам зборот Тишина,
ја нарушувам.

Кога го изговарам зборот Ништо,
чинам нешто што ниедно небитие не може да го содржи.

За иднината на литературата - Урсула К. Ле Гвин

„Мислам дека доаѓа тешко време кога ќе сакаме да ги чуеме писателите кои нудат алтернатива на ова што го живееме денес, кои на нашето општество исполнето со страв и опседнато со технологија можат да му понудат поинакви облици на постоење, дури и нова надеж.

Ќе ни бидат потребни писатели кои се сеќаваат на слободата. Поетите, визионерите, реалистите ја шират реалноста. Сега ни се потребни писатели кои прават разлика помеѓу производството на стока за широка потрошувачка и занимавањето со уметност. 

Знаете, книгите не се само стока. Мотивот за профит често се коси со целите на уметноста. Ние живееме во капитализам кој делува непобедливо. Но такви беа и божествените права на кралевите. Луѓето можат успешно да пружат отпор на секој облик на човечко насилство. 

Отпорот и промената често почнуваат во уметноста, а многу често во нашата уметност - уметноста на зборовите.“

Урсула К. Ле Гвин
(На 65-то доделување на Националните книжевни награди во ресторанот Cipriani Wall Street во Њујорк, 2014 година)